महाराष्ट्रात मतदार याद्यांचा मोठा बदल,2.06 कोटी नावे प्रारूप यादीत नाहीत; 30 सप्टेंबरपर्यंत हरकती दाखल करा
महाराष्ट्रातील 288 विधानसभा मतदारसंघांच्या प्रारूप मतदार याद्या प्रसिद्ध झाल्या.2 कोटी 6 लाख 88 हजार 487 मतदारांची नावे बाजूला ठेवण्यात आली असून 30 सप्टेंबरपर्यंत हरकती दाखल करता येणार आहेत.
महाराष्ट्रातील 288 विधानसभा मतदारसंघांच्या प्रारूप मतदार याद्या प्रसिद्ध; 2 कोटींहून अधिक नावे बाजूला
मुंबई | ज्ञानप्रवाह न्यूज : विशेष सखोल पुनरिक्षण कार्यक्रम अर्थात SIR (Special Intensive Revision) अंतर्गत महाराष्ट्रातील सर्व 288 विधानसभा मतदारसंघांच्या प्रारूप मतदार याद्या सोमवारी प्रसिद्ध करण्यात आल्या. या प्रक्रियेमुळे राज्याच्या मतदार यादीत मोठा बदल झाल्याचे समोर आले आहे.
SIR मोहिमेपूर्वी महाराष्ट्रात एकूण 9 कोटी 78 लाख 54 हजार 49 मतदार नोंदणीकृत होते. मात्र, गणना प्रपत्र प्राप्त न झाल्याने किंवा आवश्यक कागदपत्रांची पूर्तता न झाल्यामुळे 2 कोटी 6 लाख 88 हजार 487 मतदारांची नावे सध्याच्या प्रारूप मतदार यादीत समाविष्ट करण्यात आलेली नाहीत. ही संख्या एकूण मतदारांच्या सुमारे 21.14 टक्के आहे.
या प्रक्रियेनंतर राज्यातील प्रारूप मतदार यादीत आता 7 कोटी 71 लाख 65 हजार 562 मतदार असल्याचे नमूद करण्यात आले आहे.
प्रारूप यादीतील मतदारांचे चित्र
प्रारूप मतदार यादीतील एकूण मतदारांमध्ये — पुरुष मतदार : 3 कोटी 95 लाख 89 हजार 905
महिला मतदार : 3 कोटी 75 लाख 72 हजार 570
तृतीयपंथी मतदार : 3 हजार 87 असा समावेश आहे.
दोन कोटींहून अधिक नावे का झाली बाजूला?
जुन्या मतदार यादीतील तब्बल 2 कोटींहून अधिक मतदारांची नावे प्रारूप यादीत न दिसण्यामागे विविध कारणे असल्याचे सांगण्यात आले आहे.
यामध्ये प्रामुख्याने मतदार दिलेल्या पत्त्यावर उपलब्ध नसणे किंवा संबंधित व्यक्तीचा शोध न लागणे, त्या ठिकाणाहून अन्यत्र स्थायी अथवा तात्पुरते स्थलांतरित होणे, मतदाराचा मृत्यू झालेला असणे, दुसऱ्या ठिकाणी मतदार म्हणून नवीन नोंदणी झालेली असणे, दुबार नोंदणी असणे आदी कारणांचा समावेश आहे.
याशिवाय काही मतदार किंवा त्यांच्या कुटुंबीयांनी गणना प्रपत्र भरून देण्यास नकार दिल्याने किंवा आवश्यक कागदपत्रांची पूर्तता न झाल्यामुळेही संबंधित नावे प्रारूप यादीत समाविष्ट करण्यात आलेली नसल्याचे सांगण्यात आले आहे.
30 सप्टेंबरपर्यंत हरकती दाखल करण्याची संधी
प्रारूप मतदार यादी प्रसिद्ध झाल्यानंतर मतदारांना आपल्या नावाची स्थिती तपासण्याची संधी मिळणार आहे. ज्या मतदारांचे नाव प्रारूप यादीत आढळत नाही किंवा यादीतील नोंदीबाबत आक्षेप आहे, त्यांना 30 सप्टेंबरपर्यंत हरकत किंवा दावा दाखल करता येणार आहे.
त्यामुळे मतदारांनी आपले नाव प्रारूप मतदार यादीत आहे की नाही, याची पडताळणी करणे महत्त्वाचे ठरणार आहे. नाव वगळले गेले असल्यास निर्धारित कालावधीत संबंधित दावा किंवा हरकत दाखल करून आवश्यक कागदपत्रे सादर करता येतील.
दरम्यान अंतिम मतदार यादी प्रसिद्ध होण्यापूर्वी दावे आणि हरकतींच्या प्रक्रियेतून पात्र मतदारांची नावे पुन्हा समाविष्ट होण्याची शक्यता आहे. त्यामुळे प्रारूप यादीतील नोंद म्हणजे अंतिम मतदार यादीतील स्थिती असे समजणे योग्य ठरणार नाही.
Add Comment