गहिनीनाथ महाराज औसेकर यांचा मुंबईत होणार मानाचा सन्मान; विठ्ठल सेवा पुरस्कार जाहीर

गहिनीनाथ महाराज औसेकर यांना विठ्ठल सेवा पुरस्कार,१६ ऑगस्टला मुंबईत मानाचा सन्मान

पंढरपूरच्या विठ्ठल सेवेला मानाचा मुजरा! गहिनीनाथ महाराज औसेकर यांना विठ्ठल सेवा पुरस्कार

श्री विठ्ठल-रुक्मिणी मंदिरे समितीचे सह-अध्यक्ष गहिनीनाथ महाराज औसेकर यांना आध्यात्मिक, धार्मिक व वारकरी सेवेसाठी ‘विठ्ठल सेवा पुरस्कार १६ ऑगस्टला मुंबईत सन्मान सोहळा

पंढरपूर|ज्ञानप्रवाह न्यूज,दि.१२ ऑगस्ट २०२६: श्री विठ्ठल – रुक्मिणी मंदिर सेवा,वारकरी परंपरा आणि समाजप्रबोधनाच्या क्षेत्रात उल्लेखनीय योगदान देणारे श्री विठ्ठल-रुक्मिणी मंदिरे समितीचे सह-अध्यक्ष गहिनीनाथ महाराज औसेकर यांचा आता आणखी एका मानाच्या पुरस्काराने गौरव होणार आहे. त्यांच्या दीर्घकालीन आध्यात्मिक, धार्मिक, सामाजिक आणि वारकरी सेवेसाठी त्यांना विठ्ठल सेवा पुरस्कार प्रदान करण्यात येणार आहे.

अखिल भारतीय वीरशैव लिंगायत महासभा (रजि.), महाराष्ट्र राज्य शाखेच्या वतीने मुंबई येथे विशेष ‘Felicitation Ceremony’ आयोजित करण्यात आला आहे. १६ ऑगस्ट रोजी सकाळी ११ वाजता यशवंतराव चव्हाण सेंटर, नरिमन पॉईंट, मुंबई येथे हा सन्मान सोहळा होणार आहे.

या सोहळ्यास कर्नाटकचे मुख्यमंत्री डी.के.शिवकुमार, महाराष्ट्राचे माजी मुख्यमंत्री सुशीलकुमार शिंदे, कर्नाटकचे ग्रामीण विकास व पंचायत राज मंत्री तथा अखिल भारतीय वीरशैव लिंगायत महासभेचे अध्यक्ष ईश्वर खांड्रे, महाराष्ट्राचे उपमुख्यमंत्री एकनाथ शिंदे, कर्नाटक विधान परिषदेचे सभापती बसवराज होरट्टी आणि महाराष्ट्र विधानसभेचे अध्यक्ष राहुल नार्वेकर यांच्यासह विविध क्षेत्रांतील मान्यवर उपस्थित राहणार आहेत.

मंदिर सेवेपासून भाविकांच्या सुविधांपर्यंत योगदान

गहिनीनाथ महाराज औसेकर यांनी श्री विठ्ठल-रुक्मिणी मंदिरे समितीच्या माध्यमातून मंदिर संवर्धन आणि भाविक सेवा अधिक सक्षम करण्यासाठी सातत्याने योगदान दिले आहे. मंदिराची ऐतिहासिक व धार्मिक वास्तू जतन करण्याबरोबरच मोठ्या यात्रांच्या काळात लाखो भाविकांसाठी नियोजनबद्ध सुविधा उपलब्ध करून देण्याच्या कामात त्यांचा सक्रिय सहभाग राहिला आहे.

आषाढी आणि कार्तिकी यात्रांसह विविध धार्मिक सोहळ्यांमध्ये दर्शन व्यवस्था, भाविक निवास, भोजन, पिण्याचे पाणी, आरोग्य सुविधा, सुरक्षा, दर्शन रांग व्यवस्थापन आणि महिला भाविकांसाठी आवश्यक सुविधांच्या नियोजनात त्यांनी मार्गदर्शन केले आहे.

आधुनिक तंत्रज्ञानाचा वापर करून भाविक सेवा अधिक सुलभ करण्यासोबतच स्वच्छता, पर्यावरण संवर्धन, व्यसनमुक्ती आणि सामाजिक ऐक्याचा संदेश वारकरी परंपरेच्या माध्यमातून समाजापर्यंत पोहोचविण्याच्या कार्यालाही त्यांनी प्रोत्साहन दिले आहे.

३० ते ३२ पुरस्कारांनी यापूर्वी गौरव

गहिनीनाथ महाराज औसेकर यांच्या कार्याची यापूर्वीही विविध स्तरांवर दखल घेण्यात आली आहे. त्यांना ‘महाराष्ट्ररत्न पुरस्कार’, ‘शनिरत्न पुरस्कार’ आणि ‘मानवसेवा जीवनगौरव राज्यस्तरीय पुरस्कार’ यांसह विविध सुमारे ३० ते ३२ पुरस्कारांनी गौरविण्यात आले आहे.

कीर्तन,समाजप्रबोधन, वारकरी संप्रदायाची परंपरा, आध्यात्मिक कार्य आणि मानवसेवा या क्षेत्रातील त्यांच्या योगदानाचीही विविध संस्थांनी दखल घेतली आहे. महाराष्ट्र शासनाच्या सांस्कृतिक कार्य विभागाच्या माध्यमातूनही त्यांच्या कीर्तन आणि समाजप्रबोधन क्षेत्रातील कार्याची दखल घेण्यात आली आहे.

पुरस्कारात पंढरपूरच्या वारकरी परंपरेचाही गौरव

‘विठ्ठल सेवा पुरस्कार’ हा केवळ गहिनीनाथ महाराज औसेकर यांच्या वैयक्तिक कार्याचा सन्मान नसून, पंढरपूरची समृद्ध वारकरी परंपरा, श्री विठ्ठल-रुक्मिणी मंदिराची सेवा आणि लाखो भाविकांच्या श्रद्धेचा गौरव म्हणूनही या सन्मानाकडे पाहिले जात आहे.

राष्ट्रीय स्तरावरील संस्थेकडून होणाऱ्या या गौरवामुळे पंढरपूरच्या धार्मिक आणि आध्यात्मिक क्षेत्राला आणखी एक मानाचा सन्मान मिळणार असून, वारकरी आणि भक्त परिवारातही या पुरस्काराबद्दल उत्सुकता आहे.