पुणे विभाग शिक्षक मतदारसंघ शिवसेनेकडे यावा; मंगेश चिवटे यांच्या उमेदवारीसाठी सर्व ताकद लावणार – आ.शहाजीबापू पाटील

पुणे विभाग शिक्षक मतदारसंघ शिवसेनेकडे यावा; मंगेश चिवटे यांच्या उमेदवारीसाठी सर्व ताकद लावणार – आ.शहाजीबापू पाटील

पुणे शिक्षक मतदारसंघावर शिवसेनेचा दावा; मंगेश चिवटे यांच्या उमेदवारीसाठी शहाजीबापू पाटील यांची मोठी घोषणा

मंगेश चिवटे यांच्या उमेदवारीला शहाजीबापू पाटील यांचा जाहीर पाठिंबा;शिवसेना-भाजप जागा वाटपात शिक्षक मतदारसंघावर लक्ष

पुणे विभाग शिक्षक मतदारसंघ शिवसेनेकडे यावा आणि मंगेश चिवटे यांना उमेदवारी मिळावी यासाठी शिवसेनेचे सर्व मंत्री, आमदार व पदाधिकारी प्रयत्न करतील,असे आमदार शहाजीबापू पाटील यांनी सांगोल्यातील प्रचार शुभारंभ सोहळ्यात जाहीर केले.

सांगोला | ज्ञानप्रवाह न्यूज,दि.१ ऑगस्ट २०२६ : पुणे विभाग शिक्षक मतदारसंघाच्या निवडणुकीच्या पार्श्वभूमीवर सांगोला येथे आयोजित मंगेश चिवटे यांच्या प्रचार शुभारंभ सोहळ्यात बोलताना सांगोला विधानसभा मतदारसंघाचे माजी आमदार शहाजीबापू पाटील यांनी मंगेश चिवटे यांच्या उमेदवारीला जाहीर पाठिंबा देत महत्त्वपूर्ण विधान केले.

यावेळी माजी आमदार शहाजीबापू पाटील म्हणाले, शिवसेना -भाजप यांच्यात जागावाटप होत असताना पुणे विभाग शिक्षक मतदारसंघ हा शिवसेनेकडे यावा यासाठी आम्ही प्रयत्न करणार आहोत.तसेच मंगेश चिवटे यांना उमेदवारी मिळावी यासाठी शिवसेनेचे सर्व मंत्री, आमदार आणि पदाधिकारी पूर्ण ताकदीने प्रयत्न करतील.

पुढे बोलताना त्यांनी सांगितले की, राज्याचे माजी मुख्यमंत्री तथा विद्यमान उपमुख्यमंत्री एकनाथ शिंदे आणि खासदार डॉ.श्रीकांत शिंदे यांचे निकटवर्तीय असलेले मंगेश चिवटे यांनी आरोग्य क्षेत्रात उल्लेखनीय व लोकाभिमुख कार्य उभे केले आहे.हजारो गरजू रुग्णांना वैद्यकीय मदत मिळवून देणे, विविध आरोग्य उपक्रम राबविणे आणि समाजसेवेत सातत्याने सक्रिय राहणे, ही त्यांची मोठी ओळख आहे. याचबरोबर शिक्षकांच्या प्रश्नांसाठीही त्यांनी सातत्याने आवाज उठवत विश्वासार्ह नेतृत्व निर्माण केले आहे. त्यामुळे शिक्षकांना न्याय देणारे सक्षम प्रतिनिधित्व म्हणून त्यांना संधी मिळणे आवश्यक आहे.

यावेळी उपस्थित शिक्षकांनी आमदार शहाजीबापू पाटील यांच्या विधानाचे टाळ्यांच्या कडकडाटात स्वागत केले. शिक्षकांच्या न्याय्य हक्कांसाठी सातत्याने काम करणाऱ्या मंगेश चिवटे यांच्या पाठीशी मोठ्या ताकदीने उभे राहण्याचा निर्धारही अनेकांनी व्यक्त केला.

प्रचार शुभारंभ सोहळ्यास शिक्षक, मुख्याध्यापक,शिक्षण संस्थांचे पदाधिकारी,सामाजिक कार्यकर्ते तसेच विविध क्षेत्रातील मान्यवर मोठ्या संख्येने उपस्थित होते.

आमदार शहाजीबापू पाटील यांनी व्यक्त केलेल्या भूमिकेमुळे पुणे विभाग शिक्षक मतदारसंघाच्या राजकीय वर्तुळात या वक्तव्याची विशेष चर्चा रंगली.